BAGUIO CITY–Simple laeng nga selebrasyon ti aramiden ti lokal a gobierno ti Benguet kagiddan iti panagrambakda iti 120th Founding anniversary dagitoy inton umay a bulan ti Nobyembre.
Daytoy ket gapu paylaeng ti pandemya nga intunda iti covid-19.
Sigun kenni Governor Melchor Diclas maituloy latta ti selebrasyon ti anibersaryo ti Probinsya ngem simple laengen daytoy nu sadinu maisayangkat latta ti tradisyon wennu nainsigudan nga aramid a panagparti iti baboy wennu iti ibaloi a sao nga “owik”.
Ngem kinunana a bassit laeng ti maparti nga baboy a maiyatang iti kabunian.
Manamnama met a makipasset amin nga 13 a munisipyo iti nasao nga selebrasyon inton Nobyembre.
Inyunay-unay ti gobernador a addan kadagiti LGUs nu anya dagiti isayangkatda nga aktibidad para iti nasao nga selebrasyon.
Maipalagip nga maramrambakan ti Adivay iti Benguet iti tunggal bulan ti Nobyembre kada tawen nu sadinu naduma-duma nga aktibidad ti maisaysayangkat a pakipaspasetan iti nirib-ribo nga tatao manipud kadagiti nagduduma a munisipyo ken kadagiti kabangibang nga nga lugar.
Kasta met nga adu nga baboy ti maparparti para iti cañao iti nasao nga Probinsya.
