Balligi a naisayangkat ti Opening of National Indigenous Peoples Month ken Ibaloy Festival iti Rose Garden, Baguio City ita nga aldaw.
Addan daytoy ti tema a “Mga katutubo at mga Katutubong Dunong: Pahalagahan, Pangalagaan at Parangalan.”
Opisial a nangrugi ti programa iti oras ti alas diez ti agsapa ken nagleppas iti alas dos ti malem.
Nangipaay ti pananglukat a mensahe ni Baguio City Councilor Jose Molintas, simmaruno ti cultural dance manipod iti grupo ti San Vicente Cultural performers, ken mensahe manipod iti dadduma nga opisial iti siudad ti Baguio ken probinsia ti Benguet.
Kaaduan a nangipaay ti mensahe ket dagiti nadutukan kas Indigenous Peoples Mandatory Representative wenno IPMR.
Kalpasan ti mensahe, naisayangkat ti ritwal nga “uwik” wenno wagas a panangpapatay ti baboy a kadawyan nga ar-aramiden ti tribu ti Ibaloy wenno Igorot tunggal maangay ti espesial nga pasken.
Ti “uwik” ket indauloan ti maysa nga “elder” manipod iti grupo ti Onjon ni Ivadoi, ken napamasak ti panagkararag para iti ad-adu pay a bendision.
Kabayatanna, sigun iti mensahe ti pannakabagi ni Benguet Governor Melchor Diclas, ti panagrambak ti National Indigenous Peoples Month ken Ibaloy Festival iti tunggal tawen ket tapno ad-adda a mapreserba ti kultura dagiti Ibaloi, ken tapno mabigbig dagiti inaramid dagiti immuna nga Ibaloi elders iti siudad ti Baguio ken probinsia ti Benguet.
Maragsakan daytoy gaputa nangngegan ti gobierno dagiti kararag dagiti immuna nga “Ibaloi people” a maaddaan ti aldaw wenno bulan a marambakan ti nasao a pasken.
Pagyamyamananna iti Namarsua gaputa nabendisionan ti probinsia ti Benguet, ken gaputa agtaltalinaed a natalna.
Ginuyuguyna dagiti indibidual nangruna dagiti agtutubo ti nasao a tribu a makipaset ti programa a maisaysayangkat tapno adu pay ti maamuan dagitoy, ken tapno agserbi a pagwadan iti komunidad a masakupanda.
Mainaig iti daytoy, naobserbaran ti pannakipaset dagiti kameng ti POSD ken PNP, tapno mapagtalinaed ti talna ken kappia bayat ti nasao a pasken.
