Pormal a kiniddaw ti National Bureau of Investigation (NBI) iti Philippine National Police (PNP) ti dagus a pannakasuspinder ti lisensiya ti paltog ni Senator Ronald “Bato” dela Rosa.
Maibasar iti surat a naipatulod kenni PNP chief General Jose Nartatez Jr. ken pinirmaan ni NBI Director Melvin Matibag, nakiddaw iti PNP nga ibilinda kenni Sen. Dela Rosa ti panangisuko iti 118 a rehistrado a paltog iti kaasitgan a PNP unit wenno iti NBI iti uneg ti 48 nga oras.
Impetteng ti NBI a karaman iti rehistrado a paltog ti Senador ti semi-automatic ken select-fire rifles, UZI submachine gun variants, high-powered .338 caliber rifles, battlefield-grade shotguns, ken dadduma pay.
Kiniddaw pay ti NBI iti PNP a makikoordinar kadagiti amin a territorial units, partikular iti Davao Region, tapno maipatungpal ti dagus a pannakakumpiskar dagiti paltog ti Senador.
Daytoy ket kasaruno ti arrest warrant nga impaulog ti International Criminal Court (ICC) kontra iti Senador.
