Inlawlawag ti Malacañang nga awan ti kondisyonna ti impetteng ni President Ferdinand Marcos Jr., a silulukat a makikappia iti pamilya Duterte iti kanito nga akseptaranda daytoy.
Kinumpirmar daytoy ni Presidential Communications Undersecretary Claire Castro no sadino kinunana a daytoy ket para kadagiti Pilipino ken ti metlaeng Pilipinas.
Sigun kenkuana, saan a makikappia ti presidente kadagiti kalabanna iti politika no adda ti kasukatna.
Impettengna daytoy kalpasan ti kinuna da sigud a presidential spokesman Harry Roque ken sigud a chief presidential legal counsel Salvador Panelo a makikappia laeng dagitoy no maisubli ni sigud a president Rodrigo Duterte iti Pilipinas.
Malaksid iti dayta, kinuna metlaeng ni senador Bong Go a no sipupuso ti presidente a makikappia ket siguraduenna a maiyawid iti Pilipinas ni Duterte.
Impaganetget pay ni Castro nga indiaya ti Presidente ti reconciliation saan laeng a para kadagiti Duterte ngem para kadagiti amin a political opponents daytoy ken kangrunaanna ar-aramidenna daytoy kas ama iti Pilipinas.