BAGUIO CITY – Al-allukuyen ti Department of Agriculture (DA)-Cordillera Administrative Region dagiti mannalon ditoy rehion tapno makipasetda kadagiti programa ti ahensia.
Sigun ken ni Danilo Daguio, Regional Technical Director (RTD) ti DA-CAR, maysa kadagiti kangrunaan a programa a mabalin a pakipasetan dagiti mannalon ket ti Search for Gawad Saka Awardee.
Itay laeng nabiit ket naipatungpal ti 2019 Gawad Saka Awarding Ceremony ti DA-CAR iti maysa a hotel ditoy siudad ti Baguio kagiddan ti pannakarambak ti maika-31 a Founding Anniversary ti ahensia.
Inladawan ni Daguio ti Gawad Saka nga isu ti “most prestigious” wenno kadakkelan a pasalip nga idadauluan ti DA-CAR.
Kinunana a malaksid iti plaque ket maipaayan pay iti dakkel a gatad kas cash prize dagiti mangabak.
Malaksid iti dayta ket mai-feature wenno maiparang pay dagiti mangabak kabayatan ti pannakarambak ti anibesario ti DA-CAR.
Binalakadan ni Daguio dagiti interesado a mannalon tapno agtulnogda kadagiti pagalagadan tapno makualipikarda iti pasalip.
Innayonna a nasken laeng nga adda ti manginominar kadagiti mannalon tapno makualipikar dagitoy iti municipal level ti pasalip agingga a makadanonda iti provincial ken regional level.
