Pinainget ni Baguio City Mayor Benjamin Magalong ti panangipatungpal ti siudad iti Pansa-Nopen Tayo Fellows Program kas paset ti programa iti solid waste management ken circular economy.
Panggep iti Pansa-nopen Tayo Circular Economy Program a baliwan ti sistema mainaig iti basura iti siudad babaen iti panag-recycle, panag-reuse, ken panag-repurpose iti publiko tapno makessayan ti basura ken ma-maximize dagiti resources.
Iti pannakiuman ti Bombo Radyo, imbinglay ni Magalong a ti Baguio City ket maysa kadagiti 20 a local government units iti pagilian a napili kas pilot area ti United Nations Development Programme (UNDP) iti programa a mangipatungpal iti circular economy, a suportado ti European Union.
Ti nasao a programa ket umuna nga impatungpal ti siyudad iti innem a dadakkel a barangay, a pagadalanda ken pangipadasanda kadagiti sistema ken nasursuro a wagas iti panangisina, panang-recycle ken panang-reuse iti basura sakbay a maipatungpal iti amin a barangay iti siudad.
Impeksa met ni Magalong a nairugi itan ti panagkolektar iti food waste iti Session Road, a paset ti panangpatalged iti total segregation tapno maisina kadagiti recyclable materials.
Inlawlawagna a babaen iti Extended Producer Responsibility (EPR), nalaklaka itan a maammoan no sadino nga ilako dagiti recyclable materials.
Kabayatanna, maiproseso met dagiti food waste babaen kadagiti uppat a Black Soldier Fly Facilities iti siudad, a pagikabkabilan dagiti food waste tapno kanen ken ma-decompose babaen dagiti larva imbes a diretso a maiturong kadagiti landfill.
Iti sabali a bangir, pinainget pay ni Magalong ti panangipatumpal iti garbage fee collection, a sigun kenkuana ket nabayagenen ken overdue daytoyen nga isyu, gaputa saan nga umiso a ti highly urbanized city kas iti siudad ket P20 laeng ti singirda iti tunggal household para iti panagkolektar kadagiti basura.
Impeksana pay a masapul a maipatungpal ti kanayonan a garbage fee tapno mapapintas pay ti solid waste management ken dagiti serbisio para iti publiko iti siudad iti Baguio.| via Bombo Khey Reparip