Inulit manen nga impakaamo ti Bangko Sentral ng Pilipinas (BSP) a dagiti papel a kuarta a nakaitampokan dagiti bannuar ti pagilian ket agtalinaed a maaramat kaduana dagiti baro a polymer bills.
Inruar ti central bank ti statement maysa nga aldaw kalpasan nga inyebkas ti August Twenty-One Movement (ATOM) ti saanda a pananganamong iti desision ti BSP, a panangikkat kadagiti nasional a bannuar manipud kadagiti banknotes.
Sigun iti nasao a grupo, padpasen manen ti pamilia ti diktador a mangikagkagumaan a mangisurat manen iti pakasaritaan ken mangpunas kadagiti bannuar a situtured a nakiranget para iti wayawaya dagiti Pilipino.
Nabukel ti August Twenty-One Movement (ATOM) kasaruno ti pammapatay kenni daydi Senador Benigno “Ninoy” Aquino Jr. idi tawen 1983 a naiparang iti P500-paper banknote kaduana ti daydi asawana a ni President Corazon Aquino.
Impeksa metlaeng ni Kiko Aquino Dee, ti apoko ni Ninoy ken Cory Aquino, ti pannakadismayana iti pannakadisenyo manen dagiti banknotes.
