BAGUIO CITY – Mailaksiden dagiti public utility jeeps wenno para-pasahero a jeep iti number coding ditoy siudad ti Baguio.
Iti panakiyuman ti Bombo Radyo Baguio, kinuna ni Councilor Benny Bomogao nga inaprobaran ti Transport and Traffic Management Committee (TTMC) ti singasing para iti nasao nga addang.
Nupay kasta, kinunana a limitado ken agingga laeng iti alas dies ti agsapa ti nasao a panakailaksid dagiti jeep iti number coding ti Baguio.
Kinunana nga adu dagiti umili a mangkidkiddaw iti nasao a banag gapu iti kinakurang dagiti jeep a paglugluganan dagitoy.
Sigun met kenni Federation of Jeepney Operators and Drivers Association for Baguio City, Benguet and La Union president Pat Evangelista, babaen iti nasao nga addang ket maipaayanen dagiti pasahero iti napintas a serbisyo nangruna agiti mangmangged ken estudyante.
