BAGUIO CITY – Pormalen a nailukat ti paragliding activity sadiay Mankayan, Benguet nga immunan a maitaltal-o ken mapagsasaritaan.
Inlawlawagna ni Mayor Frenzel Ayong ti proseso a nasken nga aramiden ken suroten dagiti indibidual nga agpangpanggep nga agpadas iti nasao nga aktibidad.
Dinakamatna a nasken nga ipareserba dagiti indibidual ti aldaw a pagturonganda sadiay gaputa limitado laeng ti bilang nga iakomodarda iti maysa nga aldaw.
Inayonna a dagiti mapalubosan nga umuneg iti masakupan dagitoy ket dagiti laeng indbibual a magapu iti low risk area.
Kabayatanna, kinunana a manarimaan metten ti panagsanay dagiti agtutubo sadiay Mankayan nga agbalin a piloto iti paragliding activity babaen iti tulong dagiti paragliding expert.
Impetteng ni Ayong a dumanon iti 3,500 ti bayadan dagiti bisita bayat a dumanon met iti 2500 agingga 3,000 ti singir kadagiti residente sadiay iti uneg ti sangapulo agingga kinse a minutos.
Impanamnamana pay a natalged ti nasao nga aktibidad gaputa adda ti piloto a mangkuyog kadagiti indibidual nga agtayab iti tangatang.
