BAGUIO CITY – Panggep ti maysa a realty and development corporation nga agibangon iti parking facility iti agdama a ‘pay parking area’ sadiay Kilometer 5, La Trinidad, Benguet manipud iti sigud a plano a mall.
Sigun kenni Juanito Teope, panakabagi ti Jarco Corporation, nagdesisyon ti kompanyada nga agibangon laengen iti tallo a kadsaaran a parking facility nangruna ta agbalbalin a parikut ita a panawen dagiti paradaan.
Kiniddaw met ti Sangguniang Bayan ti panangipaay ti kompanya iti pinal a singasing ken formal letter dagitoy iti opisina ni Mayor Romeo Salda para iti panangipaay ti mayor iti endorsement iti daytoy tapnu makabukel ti konseho iti joint committee a mangadal iti nasao a panggep.
Sigun met kenni Vice Mayor Joey Marrero, kasapulan nga adalen ti konseho ti kontrata a napirmaan iti nagbaetan ti munisipyo ken ti nasao a kompanya.
Dinakamat pay ni Mayor Salda a maipasidong ti singasing a pla no iti umno a proseso kas iti panakakonsulta ti publiko tapnu maamuan ti benneg dagitoy.
Innayonna a silulukat ti La Trinidad iti aniaman a development ngem nasken a maipasidong dagitoy iti umno a proseso tapnu awan ti tumaod a parikut.
Maibasar iti waragawag ni Teope, tunggal kadsaaran ket mabalin a makalaon iti 170 a lugan.