BAGUIO CITY – Inreklamo ti Dallac-Nanong-Minanga Indigenous Peoples Organization (DANAMI IPO) sadiay Tabuk City, Kalinga ti maatap a panaglabsing ni National Commission on Indigenous Peoples (NCIP)-Cordillera and Region 1 Commissioner Gaspar Cayat iti Section 3 (c) ti RA 3019 wenno ti Anti-Graft and Corrupt Practices Act.
Intunda daytoy ti maatap a saan a direkta a panagkiddawna iti pasuksuk para iti panakaipaay ti Certificate Precondition para iti maisaksakad nga Upper Tabuk Hydro Power Plant (UTHPP) a maibangon iti Tanudan River a masakupan ti ancestral domain ti DANAMI IPO.
Inreklamoda pay ni Cayat iti grave misconduct gapu iti maatap a panakibiang daytoy iti panakaisayangkat ti Free and Prior Informed Consent (FPIC) process iti nasao a proyekto.
Iti interview ti Bombo Radyo Baguio, kinuna ni Jerome Tabanganay, presidente ti DANAMI IPO nga impilana ti affidavit-complaint kontra kenni Cayat iti Presidential Anti-Corruption Commission (PACC) gapu kadagiti nasao a kaso nga administratibo ken kriminal.
Mamati daytoy a nalawag a panakibiyang ken pananglapped ti inaramid ni Cayat iti Free and Prior Informed Consent (FPIC) process ti proyekto iti indigenous cultural community nangruna ta nalawag iti paglintegan ti NCIP a saan a karaman ti NCIP Commissioner iti panakaisayangkat ti FPIC process.
Mangnamnama pay ni Tabanganay nga imbestigaran ti PACC ni Cayat ken mapilaan ti commissioner iti kaskenan a kaso.
Maibasar iti affidavit-complaint ni Tabanganay, dagiti panaglabsing ket inaramid ni Cayat idi nakitaripnong daytoy kadagiti elders ti Dallac, Nanong ken Minanga idi December 2019 sadiay Tabuk City nupay saan a nakadar-ay ditoy ni Tabanganay.
Nailanad iti joint-affidavit dagiti dimmar-ay iti taripnong dagiti alegasyon kontra kenni Cayat kas iti sumaganad: imbaga ni Commissioner Cayat a daytoy ket sigud nga aktibista ken maysa kadagiti nangtubngar iti Chico Dam project; saan a maituloy ti UTHPP no saanna nga iyendorso iti NCIP ken saan a maipaayan ti Certificat Precondition no saanna nga iyendorso; nasken a 50-50 ti profit sharing ken nasken nga ipetteng ti DANAMI IPO ti nasao a sistema ti panagbingay iti proponent ti proyekto.
Nailanad pay iti joint-affidavit a kinuna ni Commissioner Cayat a 100 percent a sigurado daytoy nga ilako ni Engr. Daniel Peckley Jr. a proponent ti proyekto ti nasao a proyekto iti sabali nga imbestor.
Nailanad metlaeng iti joint-affidavit nga imbaga ni Commissioner Cayat a nasken a makisarita kenni Tabuk City Mayor Darwin Estrañero dagiti maseknan a komunidad ken uray pay Engr. Peckley tapnu maiyendorso ti proyekto.
Nailanad pay nga imbaga ni Commissioner Cayat a nasken a kumbinsiren ti DANAMI IPO dagiti mangtubtubngar iti proyekto para iti panakaituloy daytoy ken napimpintas no adda ti dadduma a sumrek a mangaramid iti hydro project.
Nailanad metlaeng iti joint-affidavit nga imbaga ni Commissioner Cayat a ni Engr. Peckley Jr. ket manugang a lalaki ni Satur Ocampo a pro-NPA isut gapuna a sekreto a mangited daytoy ti revolutionary tax iti NPA.
Sigun kenni Tabanganay, dagiti nasao a waragawag ti commissioner ket mangipakpakita iti panagkiddaw daytoy ti pasuksuk tapnu iyendorsona ti proyekto iti NCIP, iti panangdiktarna iti saan a panagpirma ti DANAMI IPO iti MOA kenni Engr. Peckley Jr., iti panangpadakesna iti inhenyero; iti panangidiktarna iti panakisarita ti DANAMI IPO kenni Mayor Estrañero ken iti panakipinnirmada ti katulagan iti sabali a kompanya a pabpaboran ti nasao a mayor.
