BAGUIO CITY – Irekreklamo dagiti kailyan a kameng dagiti tribo a Bago ken Kankana-ey ti panangukopar ti maysa a kompanya ti semento iti loteda nga addaan kalawa a 142 ektarya sadiay Barangay Labayog, Sison, Pangasinan nga asideg sadiay Tuba, Benguet.
Iti panakiyuman ti Bombo Radyo kenni David Patungan, panakabagi ti Bago Tribe sadiay Sison, Pangasinan, kinunana nga idi pay 1968 wenno 1969 a nangrugi ti panagminas ti Northern Cement Company iti lote dagitoy tapnu agala kadagiti raw materials para iti ar-aramiden dagitoy a semento.
Innayonda a sadiay payen a nangipasdek iti planta ti nasao a kompanya a nagresulta iti panangpukanda kadagiti agbunga a kaykayo ken iti panakapataud ti polusyon ken tapok a naka-apektar kadagiti babbalay ken mulmula.
Impettengna a namin adun a nagturongda iti kompanya tapnu iparang dagiti dokumento ti titulo a mangpaneknek a tagikua-da ti lote ngem saan dagitoy a binigbig ti maseknan a kompanya.
Inaklonna a saanda nga indandanun ti pakaseknanda iti gobyerno gaputa naturturay ti nasao a kompanya ti semento.
Nupay kasta, kalpasan ti adu a tawen ket nagtaripnongda idi kalman kadagiti maseknan nga opisyal ti kompanya seknan iti parikutda.
Siraragsak nga inwaragawagna ti panangpapanawda kadagiti heavy equipments a maar-aramat iti panagminas iti loteda kas kadagiti bulldozer ken backhoe.
Iti baet daytoy, inaklonna nga awan pay ti nabukel a kasuratan para iti panangisardeng ti kompanya iti operasyon daytoy iti loteda iti baet a naipasardengen ti panagminas sadiay.
Inaladanda metten ti aglawlaw ti loteda tapnu saan a makastrek dagiti empleyado ti nasao a kompanya ti semento.
