BAGUIO CITY – Mapalpalagipan dagiti nagannak a saanda nga urayen ti sumaruno pay a lawas sakbay nga i-enrollda dagiti annakda gapu ta manarimaanen ti klase kadagiti nagduduma a pagadalan.
Iti panakiuman ti Bombo Radyo kenni Dr. Soraya Faculo, Schools Division Superintendent ti Department of Education – Baguio, dumanon iti 57-K ti bilang dagiti estudyante a nakaenroll kadagiti nagduduma a pagadalan iti Baguio City kas maibasar iti kaudian nga enrollment data dagitoy.
Nupay opisyalen a nangrugi ti klase, manarimaan ladta ti enrollment ita a lawas nu sadino manamnama a dumanon iti 64-K ti pakabuklan a bilang dagiti estudyante nga ag-enroll para iti agdama nga school year.
Kagiddan dayta, kinuna ni Dr. Faculo a kasapulan pay ti kanayonan a mannursuro para kadagiti estudyante iti Senior High School nga addaan ti major a maitunos iti kasapulanna nga isuro.
Iti sabali a bangir, nagbalin a karit bayat ti panaglukat ti klase ti school environment gapu iti panagdalapos ni bagyo a Carina a nangitunda iti panakadadael dagiti sumagmamano a kagawaan iti pagadalan kas kadagiti learning resources.
Nupay kasta, dinakamat ni Dr. Faculo a nagkiddawda ti pondo iti maseknan nga ahensya para iti panakadalus ken panakatarimaan dagiti naapektaran a pagadalan.//Bombo Rob Dominguez
