BAGUIO CITY – Nainagunaran ti kaunaan a pasilidad ti Bureau of Fire and Protection (BFP) sadiay munisipyo ti Tublay,Benguet.
Pinasetan daytoy dagiti kameng ti lokal a gobierno ti Tublay, kameng ti BFP-Cordillera, dagiti opisyal ti probinsia ken dagiti umili tii nasao a munisipyo.
Sigun kenni FSSupt. Roderick Ramirez, Regional Director ti BFP-Cordillera, dakkel a tulong daytoy para kadagiti umili iti nasao a lugar iti kanito nga adda ti mapasamak nga uram.
Innayonna nga agnumar metlaeng ditoy dagiti kabangibang nga ili ti Atok ken Kapangan.
Naipasdek ti pasilidad babaen iti pondo ti BFP Central Office a dumanon iti P7.5-M bayat nga indonar met ti lokal a gobyerno ti Tublay ti lote a nakaipasdekan ti pasilidad.
Pinagyamanan met ni Tublay Mayor Armando Lauro ti inagurasyon ti nasao a pasilidad.
Dinayawna met ni outgoing Tublay Municipal Fire Marshall SFO Jade Guinyawan gapu ti panangisakad daytoy iti panakaipasdek ti opisina ti BFP sadiay.
Kabayatanna, nagserbi a guest speaker ni Benguet Governor Melchor Diclas ken iti panagbitlana ket impeksana ti panagyamanna iti BFP.
Kagiddan iti daytoy ket imbilinna ti panangaywan ti munisipyo iti naipaay kadagitoy a pasilidad.
