Impakaammo ti Barangay Beckel kadagiti amin a residente, commuters, ken motorista a temporaryo a maisera ti paset ti Benguet-Nueva Viscaya Road gapu iti Cave-In ti Pavement base wenno pannakatarimaan ti nasao a kalsada a nakatnagan idi ti maysa a menor de edad.
Sigun iti pablaak ti nasao a barangay, saan pay laeng a mapalubosan dagiti lugan a dumalyasat sadiay agingga maipaulog ti pakaammo a mabalinen daytoy a maaramat.
Kabayatanna, isingsingasing ti nasao nga opisina a dumalan dagiti motorista kadagiti alternative routes kas iti Labey-Lacamen Road ken Marlboro-Lamut Junction Road.
Iti baet dayta, kiniddaw dagitoy ti pannakaawat dagiti motorista kadagiti kapulisan, barangay officials, barangay tanods, ken dadduma pay a traffic management personnel a mangimanmando iti trapiko sadiay.
Manamnama gamin ti nailet a gunay ti trapiko sadiay nangnangruna ta addu metlaeng dagiti dumaldalan iti nasao a ruta.
Kinnidaw dagitoy a liklikan ti anyaman a komprontasyon ken ‘disrespectful behavior’ kadagiti traffic personnel gapu ta araramidenda laeng dagiti trabaho dagitoy.
Malaksid iti dayta, impettengda a nasaysayaat metlaeng a planuen a dagos dagiti byaheros ti byaheda tapno maliklikan ti anyaman nga aberya iti panagaramatda iti alternative route. //bombokaren.c.sapirao
