BAGUIO CITY – Impetteng ti Traffic Enforcement Unit (TEU) ti Baguio City Police Office (BCPO) nga ar-aramiden laeng dagiti traffic aides wenno traffic personnels ti trabahoda seknan iti panagsitar kadagiti aglablabsing kadagiti paglintegan ti trapiko ditoy siudad ti Baguio.
Sungbat daytoy ti pulisya iti reklamo ti maysa a senior citizen a taxi driver kontra iti maysa kadagiti traffic aides ti BCPO-TEU a nang-ticket kenkuana sadiay Abanao Square.
Sigun iti nasao a senior citizen, apagbiit laeng daytoy iti nasao a lugar ngem tinikitan daytoy ti nasao a pulis idinto a ti pribado a lugan a nabayag a nakaparada ken naka-hazzard park iti likodan ti luganna ket saan a nasita.
Nupay kasta, iti interview ti Bombo Radyo iti dadaulo ti BCPO-TEU a ni PMaj. Oliver Panabang, kinunana a saan a basta lattan agticket wenno agkumpiskar iti lisensia dagiti traffic aides nga awan ti rason.
Kinunana a saan daytoy a mamati a saan a sinitar ti nasao a traffic aide ti pribado a lugan a nakaparada iti likudan ti lugan ti nagreklamo gaputa amin a saan nga agtungpal iti ‘pick and go scheme’ iti nasao a lugar ket dagus a maipapaayan iti ticket.
Inyunay-unayna met a mangipapaayda iti konsiderasion nangruna no adda ti agdiskarga wenno agkarkarga kadagit parapasahero a lugan iti nasao a disso.
Al-allukuyenna met dagiti addaan reklamo kadagiti traffic aides ti siudad iti panagturong dagitoy iti opisina ti BCPO-TEU tapnu mapagsasaritaanda ti reklamo nangruna ta silulukat met ti opisinada dagitoy para iti panaka-aksion dagiti nasao a reklamo.
Impetteng pay ni Panabang a patas dagitoy iti panangrisutda kadagiti maaw-awatda a reklamo babaen iti panangipaayabda iti mairekreklamo a traffic aide tapnu agpalawag met iti dasig daytoy ken iti kanito a mapaneknekan nga adda ti nagbiddutanna ket maaramid ti umno nga aksion. (Bombo Razced Pagoli/edited)
