BAGUIO CITY – Umap-apela ita ti Department of the Interior and Local Government (DILG)-Cordillera kadagiti Local Government Units nga agbalin dagitoy a patas iti panangiwaras da ti ayuda kadagiti biktima ti gingined iti rehiyon.
Sigun kenni DILG-CAR Regional Director Araceli San Jose, adda ti maaw-awat da a reklamo manipud kadagiti umili a saan paylaeng dagitoy a naipaayan ti ayuda manipud iti gobyerno.
Inkari met ni San Jose nga imbestigaran ti ahensiya ti naawat da a reklamo tapno maduktalan ti kinapudno ken maipaulogan iti show cause order dagiti naglabsing nga opisyal.
Malaksid iti daytoy, naiballaag ti saan a panang-aramat dagiti LGUs kadagiti relief assistance iti panagkampanya gaputa saan a nagtaud daytoy iti bulsa da.
Impetteng ni San Jose nga awan koma ti pilpilyen dagiti LGUs nga ipaayan iti ayuda gaputa karbengan amin dagiti apektado a pamilya nga umawat iti tulong.
Kabayatanna, impalagip ti opisyal kadagiti LGUs nga aramaten da ti quick respond fund gaputa nailatang daytoy iti panawen ti didigra ken kalamidad kas ti gingined ken bagyo.
Inayonna pay a nasken nga ipatungpal dagiti LGUs ti contigency ken response plan apaman a mapasaran ti emerhensiya.
Imbalakad ni San Jose a nasaysayaat nu maipadanon ti tulong iti pagtaengan dagiti apektado a pamilya tapno saan a marigatan dagitoy.
