BAGUIO CITY – Maipaayanen iti patas a proteksion, panagtrato ken oportunidad para iti empleyo ken pagbiagan dagiti kwalipikado a sigud a balud a bonafide wenno pudpudno a residente ti siudad ti Baguio.
Babaen daytoy iti bileg ti Resolution No. 555, series of 2021 ti City Council a pinirmaanen ti mayor.
Nailanad iti resolusyon a napateg ti akem ti komunidad iti re-integration wenno panagsubli iti kagimongan dagiti sigud a balud babaen iti panakaipaay ti patas nga empleyo kadagitoy ken dadduma nga aktibidad a pagtaudan ti pagbiagan.
Naiyunay-unay iti resolusyon a kadawyan a makapaspasar dagiti sigud a balud iti diskriminasyon iti tay-ak ti pagbiagan ken empleyo ken dadduma nga oportunidad ken aktibidad iti komunidad.
Agresresulta daytoy iti panagrigat dagiti sigud a balud a makabiruk ti pagtrabahuan ken dadduma a desente a trabaho.
Gapu iti daytoy, naiyunay-unay iti resolusyon nga umno laeng ken patas ti panakaipaay ti umno nga atention kadagiti sigud a balud para iti baro a namnama ken nasaysayaat nga oportunidad para kadagitoy ken iti pamilyada.
