BAGUIO CITY–Immapela ti maysa a taxi driver kadagiti law enforcer ditoy siudad para iti patas a panangipatungpal dagitoy iti linteg.
Daytoy ket kasaruno pay laeng ti pannakatiliw ti nasao a taxi driver gapu iti panag-pick-up daytoy iti pasahero iti “no loading zone” iti asideg ti opisina ti Baguio City Police Office (BCPO) Station 2 sadiay Camdas Area.
Inaklon ti nasao a driver a biddut ti panagsardengna iti nasao a paset ti kalsada ngem inlawlawagna a daytoy ket tapno maipaayan iti umdas nga espasyo dagiti agkurba a lugan.
Kinunana a gapu iti panagsardengna ket naipaayan daytoy iti citation ticket para iti dua a violation daytoy.
Kinunana naklaat laengen daytoy iti panagsublina iti BCPO Station 2 idi naitulodna ti pasaherona gapu ta nakita a ti mobile a mismo dagiti pulis ket nakaparada iti igid ti kalsada a saan a naituding a parking area.
Kinunana a nakasagana daytoy nga agbayad iti multa ngem kinunana a nasken nga agbalin a patas dagiti law enforcer iti pannakaipatungpal dagiti linteg.
