BAGUIO CITY – Nakaawat manen iti pammabalaw manipud kenni Baguio City Mayor Benjamin Magalong ti manarimaan a patrabaho ti DPWH- Baguio District Engineering Office.
Iti panakiuman ti Bombo Radyo Baguio, kinuna ni City Administrator Engineer Bonifacio Dela Peña, saan a naliklikan ti mayor nga idilig ti patrabaho ti DPWH-Baguio iti patrabaho ti lokal a gobyerno.
Dinakamatna a dinayaw ni Mayor Magalong ti napintas a patrabaho ti lokal a gobyerno gaputa siento porsiento kadagiti proyekto ket nakapasa iti naituding nga standard.
Nupay kasta, impettengna a binabalaw manen ti mayor ti patrabaho ti DPWH-Baguio gapu kadagiti agkawara a construction materials a nangbara kadagiti drainage iti siudad.
Sigun kenni Dela Peña, kurang ti panagbantay ken panagwanawan dagiti architecture, engineer ken inspector ti DPWH-Baguio kadagiti patrabaho dagitoy rason a saan a mapalpalagipan dagiti kontruktor iti umno a panagdalus ken panangidolin kadagiti naaramat a materyales
Gapu iti daytoy, kiniddaw manen ni Dela Peña iti maseknan nga opisina ti regular nga inspeksyon kadagiti patrabaho dagitoy tapno awan ti maperwisiyo nga umili ken establishemento.
Impaganetgetna a saan laeng a basura ti makitkita a mangbarbara kadagiti drainage iti siudad nangruna iti panawen ti panagtutudo no di ket ado metlaeng dagiti aggreggates a nagtaud kadagiti maar-aramid a proyekto.
