BAGUIO CITY – Naawaten ti agarup 1,274 a residente ti Baguio City ken OFWs ti payout dagitoy iti sidong ti Tulong Pangkabuhayan sa ating Disadvantaged/Displaced Workers (TUPAD) Program.
Indauluan ni Department of Labor and Employment (DOLE) Secretary Silvestre Bello III ti ceremonial awarding a naangay iti Baguio Convention Center.
Kinunana a babaen iti pammilin ni Presidente Rodrigo Duterte ket nasapa a maited ti payout tapnu adda ti gastuen dagiti benipisaryo ita a Paskua iti baet a saanda pay a nagtrabaho.
Naka-awat iti sag-P5,250 dagiti sumagmanano a benipisaryo ti TUPAD Program ken ti gatad ket katukad ti 15 nga aldaw a panagtrabaho dagitoy bayat a dagiti dadduma ket nakaawat iti sag-P3,500 a katukad ti 10 nga aldaw a panagtrabaho dagitoy.
Kiniddaw pay ni Sec. Bello ti panagaramat dagiti benipisaryo iti naawatda a kwarta iti napintas a banag ken saan ketdi nga iti iligal a banag.
Imbalakadna metlaeng ti panagkamang iti DOLE-Cordillera dagiti addaan pakaseknan tapnu maipaayan iti kaskenan a tulong dagitoy.
Ti aktibidad ket paset ti simultaneous nationwide and international awarding ti TUPAD, CAMP, AKAP & Livelihood Projects a paset met ti panakarambak ti maika-87 nga anibersaryo ti DOLE.
