Nakipaset ni President Ferdinand ”Bongbong” Marcos Jr. iti maika-uppat a pulo ket innem nga ASEAN Summit and Related Summits.
Nakadanon ti eroplano a nagluganan ti Presidente ken dagiti delegado daytoy iti 5:41 p.m iti Bunga Raya VIP Complex iti Kuala Lumpur International Airport.
Ti nadutukan a caretaker ti pagilian bayat nga awan ti Presidente ket da Executive Secretary Lucas Bersamin, Justice Secretary Jesus Crispin “Boying” Remulla, ken Agrarian Reform Secretary Conrado Estrella III.
Kadua ni President Marcos ti asawana a ni First Lady Louise ”Liza” Araneta-Marcos, kasta metten da Presidential Communications Secretary Jay Ruiz, Trade and Industry Secretary Christina Aldeguer-Roque, ken Mindanao Development Authority head Tereso Magno.
Kabayatan ti summit, manamnama a talantanen ni President Marcos ti kinasoberanya ti pagilian iti baet ti geopolitical tensions, ti maipapan ti ethical ken responsible artificial intelligence, kasta metten ti takder ti pagilian kadagiti taripa ti Estados Unidos.
Mangisayangkat pay ni Marcos iti sumagmamano a bilateral meetings ken makipaset iti siam nga engagement dagiti lider, pakairamanan ti sessions iti ASEAN Business Advisory Council, youth representatives, ken parlamentarians.
Isuna ket makipaset pay iti maika-16 a Brunei, Darussalam-Indonesia-Malaysia-Philippines East ASEAN Growth Area (BIMP-EAGA) Summit, nga idauluan ti Presidente; ti maika-2 nga ASEAN-GCC Summit; ken ti ASEAN-GCC-China Summit.
