Agbalballaag ita ti Philippine Drug Enforcement Agency (PDEA) iti publiko kontra iti panagaramat iti vape a posible a naglaon wenno nalaokan iti Etomidate, maysa a kita iti anesthetic, a posible a mangitunda iti seryoso a pangta iti salun-at ti maysa nga indibidual no saan a naaramat a nasayaat.
Ti Etomidate ket maysa a legitimate nga agas a kadawyan a maar-aramat kas anesthetic tapno maipatungpal ti general anesthesia.
Nupay kasta, impetteng ti PDEA a narisgo ti panangaramat daytoy iti saan a medical related activities gapu ta mabalin daytoy a mangitunda iti napartak a sedation, hypnosis, pannakaulaw, ken dadduma pay a saan a nasayaat nga epekto iti cardiovascular system.
Ti nasao a ballaag ket kasaruno iti pannakakumpiska ti nasao nga ahensya kadagiti vape products iti lokaliadad no sadino naduktalanda a naglaon dagotoy iti nasao nga elemento.
Malaksid kadaiti vape products, naduktalan metlaeng ti Etomidate iti nagduduma a maris kas iti tablets, crystals, ken powders.
Impetteng met ni PDEA Director General Undersecretary Isagani Nerez, saan a rumbeng a maibilang kas recreational substance ti Etomidate gapu maysa daytoy kadagiti napipigsa a medical drug.
Nagballaag metlaeng daytoy a posible a saan nga ammo dagiti mangar-aramat nangnangruna dagiti agtutubo nu anya ti pudno a linaon dagiti vape catridges a mailaklako iti merkado.
Sigun iti ahensya, karaman kadagiti maar-aramat kas street name para iti nasao a produkto ti “space oil,” “zombie vapes,” ken “Kpods.”
Agtultuloy met ti koordinasyon ti nasao nga ahensya kadagiti maseknan nga ahensya ken gobyerno kasta metten kadagiti law enforcement agencies tapno maipaayan ti umdas nga atensyon ti nasao nga issue.
Kinnidaw metlaeng ti nasao nga ahensya iti publiko a saan nga agaramat, mangilako, ken ag-eksperimento kadagiti mapagduaduaan a vape products ken dagosda nga ireport kadagiti otoridad no adda dagiti maimatanganda a mapagduaduaan nga aktibidad mainaig iti nasao nga isyu.
