BAGUIO CITY – Agtultuloy ti panagawat ti Philippine Drug Enforcement Agency (PDEA) iti aplikasyon para iti Batch 11 ti intelligence officers wenno agents iti intero a pagilian.
Naamuan nga adda ti agur-uray a 185 a bakante a posisyon para iti intelligence officer ken tallo met a chemist para iti rehion Cordillera.
Sigun iti PDEA, ti minimum qualification ket nasken a 4 year degree holder, addaan iti CS professional eligibility wenno addan iti PRC License, agtawen iti duapulo ket maysa agpangato, ken agtayag iti 5’2″ para kadagiti lalaki ken 5′ met kadagiti babbai.
Para met kadagiti interesado nga agaplikar kas chemist ket nasken a nagturposda iti Bachelors Degree in Chemistry ken addaanda met laeng iti eligibility.
Kalpasan ti aplikasyon ket adda ti maipatungpal a qualifying examination kadagiti mabigbig nga uppat a Testing areas iti Luzon, Visayas, Mindanao ken NCR.
Naamuan a dumanon iti salary grade 11 ti maipaay a sweldo kadagitoy wenno katukad ti nasurok P19,000.
Para iti kanayunan nga impormasyon ket agturong laeng iti PDEA-Cordillera Regional Office sadiay Camp Dangwa, La Trinidad, Benguet.
