Impeksa ni Martin R. Francia , Regional Director ti PDEA- Cordillera nga isolated case ti pannakadiskubre ti vapes a nagpositibo iti tetrahydrocannabinol (THC), maysa a primary psychoactive component ti cannabis.
Sigun kenni Francia, dagiti dua a vapes a naipasidung ti laboratory ket boluntaryo nga inturnover mismo ti maysa a pagadalan iti siudad a saannan nga innaganan.
Impetteng ti nasao nga opisyal nga agtultuloy ti nainget a kampanyada kontra iti illegal a droga kadagiti pagadalan kasta metlaeng ti koordinasyon dagitoy iti pagadalan, babbarangay, ken dadduma pay nga ahensya ken sektor.
Kinuna ni Francia a nu isolated ita ti nasao a kaso, posible pay a dummakel wenno kumaro daytoy nu saan a maaksyonan wenno maaddaan iti intervention.
Immunan a kinumpirmar ti PDEA ti pannakailako ti marijuana-laced vape products kadagiti sumagmamano nga educational institutions iti siudad babaen iti kallepas a joint second-quarter meeting ti City Peace and Order Council ken City Anti-Drug Abuse Council (CPOC-CADAC) nga idadauloan ni Mayor Benjamin Magalong ken dagiti opisyales ti PDEA.
Malaksid iti panangilako kadagiti marijuana-laced vape products , impeksa pay dagiti imbestigador nga adda iti illegal a panangilako dagiti dried marijuana ken kush, rason tapno adadda nga ingetanda ti anti-drug operations, physical ken online distribution channels.
Impeksa pay iti PDEA-Cordillera iti nasao a taripnong a sumagmamano nga indibidual ti mangararamat itan iti courier services ken online platforms tapno makaala dagitoy ti vape cartridges ken dried marijuana sakbay nga iwarasda daytoy kadagiti designated drop off points ken meet up locations.
Agtultuloy met ti panangipatungpal dagitoy ti imbestigasyon para iti pannakabigbig dagiti suppliers ken panangdismantle iti networks dagitoy.
Kabayatanna, impeksa ni Mayor Benjamin Magalong a daytoy ti maysa kadagiti karit a sangsangwenda gapu ta magatgatang laeng daytoy iti online.
Malaksid iti dayta, magatang pay ti vapes iti nagduduma a maris no sadino saan a nalaka a mabigbig no vape ti langlang-abenda.
Gapu iti dayta, nakikoordinarda metlaengen kadagiti pagadalan seknan iti nasao nga isyu. // Bombo Noveh Organo
