BAGUIO CITY – Pirmaan dagiti agkandidato iti Barangay ken Sangguniang Kabataan (SK) Elections iti siudad ti Baguio ti maysa a peace covenant inton May 3, aldaw ti Huwebes.
Iti panakiyuman ti Bombo Radyo, kinuna ni City Election Officer Atty. John Paul Martin a maangay ti panagpirma iti peace covenant iti sango ti Baguio Cathedral.
Kinunana a babaen iti panagpirma dagiti kandidato ket maipanamnama ti natalinaay a panagkakampanya a mangrugi inton Mayo 4, aldaw ti Biyernes.
Innayona a malaksid kadagiti kandidato ket inimbitaranda met iti nasao nga aktibidad dagiti soldado, pulis, bombero ken ti National Youth Comission.
Dinakamatna a maigiddan iti nasao nga aldaw ti kick-off para iti panagrugi ti panagkakampanya.
Gapu iti daytoy, kinunana a maipalagip metlaeng dagiti linteg ken pagalagadan a kasapulan a suruten dagiti kandidato kas iti umno a pagkabilan iti campaign materials ken ti kadakkel dagitoy.
