BAGUIO CITY – Posible a mangrugi ita a lawas ti panakabakuna kontra iti COVID-19 dagiti ubbing nga agtawen ti lima agingga sangapulo ket maysa iti siudad ti Baguio.
Kasaruno daytoy ti panagrugi ti pilot pediatric vaccination kadagiti napili a lugar sadiay National Capital Region ken kabangibang daytoy a probinsia.
Sigun kenni City Health Services Officer Dr. Rowena Galpo, naingeten ti panagsagana dagiti health workers ti gobyerno ken ti pribado a sektor para iti nasao a panagbakuna iti 5-11 age group.
Kinunana a posible a maisayangkat ti nasao a panagbakuna kadagiti health centers, vaccination sites ken kadagiti ospital iti siudad.
Dinakamatna nga immuna a naitantan daytoy gapu iti nabayagan bassit a panakai-deliver ti Pfizer Biontech vaccines a maaramat kadagiti nasao nga ubbing.
Maibasar iti datus ti Philippine Statistics Authority, mapattapatta nga agarup 47,000 ti popolasyon dagiti ubbing iti siudad nga agtawen ti lima agingga sangapulo ket maysa bayat a nasurok 9,000 kadagitoy ti nagparehistro para iti panagpabakuna dagitoy kontra iti COVID-19.
