Naduktalan da Department of Public Works and Highways (DPWH) Secretary Vince Dizon kenni Baguio City Mayor Benjamin Magalong dagiti sumagmamano a peke a tubo a naaramat iti maar-aramid a dike sadiay Bauang, La Union.
Sigun kenni Dizon, dagiti tubo ket agserbi kas outlets para iti danum iti kanito nga aglayos sadiay.
Nupay kasta, naduktalan a peke dagitoy no sadino naikarga laeng nga arigna a naitapal ken naputed pay daytoy.
Naduktalan a ti contractor ti nasao a proyekto ket ti Silverwolves Construction a naipaayan iti agarup P180 million a pundo ken naideklara a nalpas daytoy idi paylaeng Mayo, 2025.
Gapu iti dayta, impetteng ni Dizon a rumbeng nga ilawlawag daytoy ti engineer.
Kabayatanna, naituding a bisitaen pay dagitoy dagiti dadduma a flood control projects iti nasao a lugar.