BAGUIO CITY – Impannakkel ken pinadawayan ni PNP Chief Ronald ‘Bato’ dela Rosa ti Police Regional Office Cordillera gapu kadagiti naaramidan dagiti pulis ti rehion iti kampanya ti administrasyon kontra iti iligal a droga ken iti kriminalidad.
Partikular a dinayawna ti bimmaba a crime rate ti rehion ken ti napartak a panakaideklara ti Apayao, Ifugao ken Mt. Province kas ‘drug-free provinces.’
Sigun kenkuana, iti entero a pagilian ket ti laeng Cordillera PNP ti nakaideklara iti tallo a probinsia a ‘drug free’ gaputa dagiti dadduma a rehion ket aginggada paylaeng iti barangay level.
Innayonna a daytoy ti mangipakpakita iti napintas a performance daigti pulis iti rehion iti nagduduma a kampanya dagitoy.
Impeksa met ti PNP Chief ti panagyamanna kadagiti dadduma nga ahensia ti gobyerno kas iti PDEA, DILG, DOH ken DSWD a tumultulong iti war on drugs ken iti rehabilitasyon dagiti drug surrenderees.
Imbilin pay ni Gen. Dela Rosa ti panangipangruna dagiti pulis-Cordillera iti sinapataanda a serbisyo ken iti panagtulnogda iti marching order ti presidente a panakapaksiat ti iligal a droga ken kriminalidad iti masakupan dagitoy.
Kabayatanna, nagpirma met iti pledge of commitment dagiti gobernador ken agdama a provincial directors ti pulisya dagiti tallo a probinsia iti rehion nga immunan a naideklara a drug free para iti panangituloy dagitoy kadagiti aktibidadda tapnu masustinir ti panagbalin dagitoy a drug free.
