BAGUIO CITY – Maisingsingasing ti permanente a panakairikep ti session road iti trapiko tunggal dominggo para iti Sunday Market Showcase.
Sigun kenni City Administrator Engr. Bonifacio Dela Pena, posible a maaprubaran daytoy tapno matulongan dagiti babassit a negosiante a mangilako kadagiti nagduduma a produktoda.
Kinunana a naragragsak ti panagpasyar ken panaglako dagiti kustomer no maipatungpal daytoy gaputa maobserbaran ti pedestrianization.
Innayonna pay a mabalin metlaeng a mairikep ti magsaysay road ken daduma pay a paset ti central business district tunggal dominggo.
Impettengna a saan daytoy a mangitunda iti nailet a gunay ti trapiko gaputa adda met dagiti alternatibo a ruta a mabalin a pagnaan dagiti lugan.
Nupay kasta, impaganetget ni Dela Pena a nasken pay nga ikonsiderada ti arungaing dagiti vendors iti merkado publiko gaputa makaapektar daytoy iti pammastrekkanda.
Inaklonna nga adda ti naawatda a dua a petision manipud kadagiti market vendors a mangtubtungar iti panakairekep ti session road tunggal dominggo gaputa maksayan ti bilang dagiti kustomerda nangruna ta daytoy nga aldaw ti kadawyan a rumrumwaran dagiti tattao.
