BAGUIO CITY – Inyunay-unay ti Philippine Statistics Authority (PSA) – Benguet a siguden nga awan ti naituding nga expiration date ti birth, marriage ken death certificate a naala manipud iti PSA, National Statistics Office, Local Civil Registrar ken Philippine Foreign Service Post.
Iti interview ti Bombo Radyo Baguio, kinuna ni Provincial Statistics Officer Imelda Buyucan, dagiti laeng end-users wenno receiving offices/agencies ti napili ken mangibagbaga a saan da nga awaten gaputa nagpason wenno saanen a valid.
Impettengna nga awan ti dinakamat ti PSA nga expiration date dagiti nadakamat a certificate gaputa uray pay nabaliwan ti opisina ti ahensiya iti National Statistics Office (NSO) ket agpada latta a balido dagitoy iti government ken private transactions.
Gapu iti daytoy, pinagyamanan ni Buyucan ti panagbalin a linteg ti ‘Permanent Validity of the Certificates of Live Birth, Death, and Marriage Act’.
Babaen iti daytoy ket malawlawagan ken makorektar dagiti end-users nga awan ti expiration date dagiti nadakamat a certificate tapno saanda a paalaen manen dagiti kliyente iti baro a certificate nga isupay a paggastosan.
