Saan a nakasungbat dagiti personnel ti City Engineering Office (CEO), City Buildings and Architecture Office (CBAO), ken City Disaster Risk Reduction and Management Office iti damag ti City Council seknan iti presyo dagiti nagatang a cat’s eye highway lights, yellow road barriers, solar-powered streetlights, ken rock netting installations.
Iti pannakiuman ti Bombo Radyo kenni Baguio City Councilor Edison Bilog, kinunana a nakalkaldaang gaputa iti baet a naipaayanda ti nawadwad nga aldaw nga agsagana para iti “inquiry,” saanda a nakasungbat ken mapapati a saanda a nakasagana idi simmangoda iti konseho.
Sigun kenkuana, simple laeng dagiti damag ken ti kidkiddawenda a dokumento ngem awan ti maipakita dagitoy.
Ngem sigun kadagiti personnel, dagiti dokumento ket adda iti audit department.
Impeksana a nu saan sungbatan ti maysa nga indibidual ti simple laeng a damag ket adda ti posible nga ilemlemmeng dagitoy.
Iti agdama, naipaayan dagiti saanen a nadakamat a personnel ti nasao nga opisina iti innem a pulo nga aldaw tapno agaramid ti “report.”
Namnamaenna a maikabil iti report ti pudno a presyo dagiti cat’s eye highway lights, yellow road barriers, solar-powered streetlights, ken rock netting installations.
Kabayatanna, “no show” met dagiti personnel ti DPWH-CAR ken Baguio City District Engineering Office (BCDEO) nga inimbitaran ti City Council.
