BAGUIO CITY – Nainget nga im-imbestigaran ti Baguio City Police Office (BCPO) ti panagtambang a nagresulta iti dagus nga ipupusay ti maysa a negosyante sadiay Kilometer 4, Marcos Highway, Baguio City idi agsapa kalman.
Immunan a nabigbig ti biktima a ni Samuel Lopez Mora, 58-anyos, negosyante, tubo ti Zambales ken residente ti Bakakeng Central, Baguio City.
Napasamak ti krimen bayat ti panangimaneho ni Mora iti lugan daytoy paawid iti pagtaenganda manipud iti panangitulodna iti anakna iti pagadalan.
Iti interview ti Bombo Radyo kenni PCol. Allen Rae Co, direktor ti BCPO, kinunana a pinalpaltogan ti dua a saan pay a nabigbig a lallaki a nakalugan iti motorsiklo ti tawa iti driver’s side iti namin adu a daras sakbay dagitoy a naglibas.
Narekober iti crime scene ti 16 a basyo ti bala ti paltog ken iti hot pursuit operation dagiti pulis ket nasarakan ti maysa a motorsiklo, dua a helmet ken jacket a maatap nga inaramat dagiti suspek.
Innayon ni Co nga adda ita ti im-imbestigaranda a persons of interest kagiddan ti panagapelana kadagiti nakasaksi iti krimen tapnu mangipaay dagitoy iti impormasyon a makatulong iti panakabigbig dagiti suspek ken iti panakarisut ti kaso.
Naamuan a ti biktima ket naikkat a kameng ti pulisya.
Kinuna pay ni Co a napapatay metlaeng ti anak ti biktima idi November 21 kalpasan a tinambangan dagiti saan pay a nabigbig nga indibidual sadiay Meycauayan City, Bulacan.
Nabigbig ti anak ti biktima a ni Dave Mora, 33-anyos ket maysa metlaeng a negosyante.
