BAGUIO CITY – Nangipila iti sabali a petisyon ti grupo dagiti negosyante sadiay La Trinidad iti Department of Justice (DOJ) manaig iti panagtubngarda iti baro a revenue code ti munisipyo.
Naamuan a dumanon iti 29 a negosyante ti nangisumitir iti petisyon iti DOJ bayat a nasurok met iti 400 ti nagpirma iti dokumento.
Kidkiddawen dagiti nasao a negosyante ti naan-anay a panakawaswas ti baro a revunue code gaputa dakkel ti ngimmatuan iti baybayadan dagitoy kas iti businss permit ken dadduma pay a babayadan.
Impanamnama met ti lokal a konseho ti La Trinidad nga adalenda manen ti nasao nga ordinansa nagruna dagiti nairekreklamo a tax rate.
Sigun kenni Councilor Guiller Galwan, paggepda met laeng a kiddawen iti opisina ti mayor ti panakaisayangkat manen ti kanayunan a konsultasion.
Kinunana a gapu iti reklamo dagiti maseknan a negosyante ket posible a kissayanda dagiti mairekreklamo a nangato a babayadan dagitoy.
