BAGUIO CITY – Panggep dagiti umili sadiay Caponga, Tublay, Benguet a mangipila iti petisyon kontra iti operasyon ti chicken dung trading center sadiay nga asideg metlaeng iti Barangay Shilan iti munisipyo ti La Trinidad.
Sigun iti maysa kadagiti maseknan a residente sadiay, kidkiddawenda ti panakaiyakar ti operasyon ti nasao a paglakuan dagiti abono a nagtaud iti takki ti manok.
Kinunana nga agingga ita ket ado kadagiti residente sadiay ti maap-apektaran gapu iti naangot nga angin iti aglawlaw nangruta ta asideg iti pagadalan ken residential areas ti nasao a paglakuan.
Innayonna nga idi pay laeng 2002 a nangrugi ti operasyon ti nasao a paglakuan ti chicken dung a nangitunda iti masansan a panagsagaba dagiti umili iti respiratory illness.
Nupay kasta, impettengna nga agingga ita ket awan ti aksion dagiti maseknan nga opisyal ti lokal a gobyerno ti Tublay ken La Trinidad.
