BAGUIO CITY – Inyunay-unay ni Atty. Julius Torres, Regional Director ti Commission on Elections – Cordillera a saan nga umawat ti field office dagitoy kadagiti petisyon a mangkidkiddaw iti pannakadiskwalipikar dagiti kandidato a nangipila iti kandidaturada.
Iti interview ti Bombo Radyo, kinuna ni Atty. Torres a nu adda ti petisyon kontra kadagiti kandidato ket masapul nga ipilada iti law department ti Commission on Elections main office idiay Manila.
Dinakamatna a mabalin metlaeng nga ipila ti petisyon babaen online nu sadino bisitaen laeng ti website ti komisyon.
Malaksid iti daytoy, innayon ti regional director a nasken a maipila dagiti nasao a petisyon sakbay a maimprenta dagiti balota.
No saan a maipila dagiti petisyon sakbay daytoy ket saanen a madiskwalipikar ti kandidatura ti maysa nga agkankandidato gapu ta nainayonen ti naganda iti balota.
