BAGUIO CITY – Mangipila ti Liga ng Transportasyon at Operators sa Pilipinas (LTOP) – Cordillera and Region 1 iti petisyon iti maseknan a regional offices ti Land Transportation Franchising and Regulatory Board (LTFRB) para iti kiddawda a panakaipangato ti minimum a plete kadagiti parapasahero a jeep.
Iti interview ti Bombo Radyo Baguio kenni Pat Evangelista, dadaulo ti LTP-Cordillera and Region 1, kinunana nga adda ti petisyon ti grupoda iti national level sadiay LTFRB Central Office a mangkidkiddaw a mapagbalina a P12 ti minimum fare kadagiti parapasahero a jeep.
Ti nasao a petisyon ket naiduma iti petisyon ti maysa pay a transport group a mangkidkiddaw a mapagbalin a P15 ti minimum fare kadagiti parapasahero a jeep.
Inlawlawagna nga ita ket marigrigatan dagitoy gapu iti nagsasaruno a panagngato ti presyo ti krudo a gidgiddanan ti panagngina met dagiti spare parts ti lugan.
Dinakamatna ti addangda a panagpila ti petisyon iti regional level ket balakad ti national office dagitoy nangruna ta amkenda a saan a mairaman ti Cordillera ken Region 1 no mapatgan ti nasao a petisyon a kas iti napalabas.
Sigun pay kenni Evangelista, iti planoda ket P12.50 ti kiddawenda a baro a minimum fare kadagiti parapasahero a jeep iti Cordillera nangruna ta siguden a nangatngato iti 50 centavos ti plete iti Cordillera no idilig iti lowland.
Inyunay-unay pay ni Evangelista a nasken a saan laeng a ti tranport sector ti mangibaklay iti epekto ti panagngato ti presyo ti krudo.
Dinakamatna a no mabalin ket ibaklay met ti gobyerno ti uray P5 agingga P5 iti tunggal litro ti krudo kas subsidiya iti transport group tapnu malag-anan met dagitoy.
