BAGUIO CITY – Aktibo ti Philippine Embassy sadiay London, England a paset ti United Kingdom a tumultulong kadagiti Pilipino sadiay nga apektado iti COVID-19 pandemic.
Iti interbyu ti Bombo Radyo-Baguio ken ni Atty. Aimee Alado, maysa a Pilipino sadiay UK, kinunana a maipatpatungpal ti skeletal services iti embahada ken 24/7 ti panangipaay daytoy iti tulong.
Kinunana nga adda dagiti Pilipino sadiay UK a nakaptan iti COVID-19 ken addan ti sumagmamano a pimmusay.
Dinakamatna nga agkurkurang latta ti suplay kadagiti personal protective equipment sadiay.
Nupay kasta, kinuna ni Alado a manamnama a mapapartak ti panagbangon ti UK babaen iti pannakaipasa ti Coronavirus Act sadiay.
Inlawlawagna a babaen iti nasao a linteg ket naipaayan ti gobierno ti UK iti ad-adu a bileg a mangipatungpal kadagiti polisia iti panangparmek iti COVID 19.
Maibasar iti report, dumanonen iti nasurok 124,000 ti positibo a kaso ti COVID 19 bayat a nasurok 16,500 dagiti pimmusay gapu iti nasao a virus sadiay UK.