Impablaak ni Philippine Drug Enforcement Agency (PDEA) Director General Moro Lazo nga agpada nga indibidual ni Lin Wei Xiong iti Pharmally Pharmaceutical Corporation ken ni Allan Lim a mapapati a karaman iti iligal a droga kas maibasar iti report ni sigud a police Colonel Eduardo Acierto.
Kinumpirmar daytoy ni Lazo bayat ti imbestigasion ti House Quad Committee iti kampania ni sigud a President Rodrigo Duterte a “war on drugs.”
Kinuna ti opisial ti Philippine Drug Enforcement Agency a nagtunos ti impormasyon nga impaay ti maysa nga agency informant ken Acierto maipapan iti kinasiasino da Lin, Allan Lim, ken Wei Xiong Lin.
Maibasar iti impormasion ti informant iti Philippine Drug Enforcement Agency , kinuna ni Lazo nga adda dagiti gundaway nga inaramat ni Lin ken Allan Lim ti nagan nga Allan Lin, Jeffrey Lin, Jeff Lin, Ayong, Lin Wei Xiong, ken Wen Li Chen.
Nakipaset iti panagdinggeg ti QuadComm ti asawa ni Lin a ni Rose Nono Lin nu sadinno, impaganetgetna a maysa laeng ti ammona a nagan ti asawana.
Maim-imbestigaran ni Lin Wei Xiong, ti financial manager iti Pharmally Pharmaceutical Corporation, kompania a nangala iti agarup P4 billion a gatad dagiti kontrata ti gobierno para iti panaggatang kadagiti suplay ti COVID-19.
