Pinaglibakan ti Philippine Health Insurance Corporation wenno PhilHealth a ti nailatangda a dandani P138 million para iti Christmas party dagitoy ket para iti makatawen a panagrambakda ti maika-30 nga anibersario ti Philhealth inton 2025 iti Pilipinas.
Sigun kenni Health Finance Policy Sector Senior Vice President Dr. Israel Francis Pargas, palso a damag ti agwarwaras nga impormasion.
Inlawlawagna a ti P138 million ket singasing nga pondo para iti aktibidadda a panagrambak ti nasao nga ahensia inton Pebrero 2025.
Kinuna ni Pargas nga inkeddeng ti nasao nga ahensia nga aramiden a maysa a tawen ti panagrambakda inton 2025, kagiddan ti National Health Insurance Program Month inton Pebrero.
Impaulog ti nasao nga ahensia ti statement kasaruno ti kinuna ni health advocate Dr. Tony Leachon a ti state insurer ket addaan iti nalabes a badyet ti Christmas party.
Iti social media post gamin ni Leachon, kinunana a saan nga ar-aramaten dagiti opisial ti Philhealth ti pondo a nasayaat.
Dinakamat pay ni Leachon ti kinuna ni President Ferdinand “Bongbong” Marcos Jr. a rumbeng a marambakan ti Paskua iti simple.
