Naka-heightened alert ita ti Philippine National Police (PNP) iti posible a tignay-protesta kabayatan iti panagdengngeg ti International Criminal Court (ICC) iti kaso ni sigud a President Duterte a mangrugi ita nga aldaw.
Sigun kenni Philippine National Police (PNP) Chief Jose Melencio Nartatez Jr., naka-heightened alerten dagiti kapulisan ken mannarimaan ti panagmonitorda iti posible a panagtitipon tapno masigurado ti seguridad ti publiko.
Maipanggep iti dayta, binilin metlaeng ni PNP Chief Nartatez, Jr. ti amin a regional unit a mangbukel ti Civil Disturbance Management (CDM) team ken siguraduenda nga adda ti nakastandby a medical emergency responder.
Numan pay imepettengna ti panangrespeto ti karbengan dagiti umili a mangiyebkas ti kapanpanunotanda , dinakamat ni PNP Chief Nartatez, Jr. a prayoridad da ti kinatalged ti publiko.
Imbinglayna a nupay maobserbaran ti maximum tolerance, binagaanna ti amin a kapulisan nga agtalinaedda a propesyonal, liklikan ti komprontasyon, ken sumurotda iti pagalagadanda.
Kabayatanna, nagkiddaw daytoy kadagiti mangsupsuporta kenni sigud a President Duterte nga agtalinaed dagitoy a kalmado ken liklikan ti anyaman a kinaranggas.
Mangrugi met ita nga aldaw ti confirmation of charges ni sigud a president Duterte idiay The Hague, Netherlands. //Bombo Karen Calpoe Sapirao
