Pagsagsaganaan ita ti Muaythai-Philippine National Team ti umadanin a 2024 Senior World Championships a maangay sadiay Greece inton Mayo trentay uno agingga Hunyo a dies ti agdama a tawen.
Iti panakiuman ti Bombo Radyo kenni Billy Alumno, coach ti Muaythai-Philippine National Team, kinunana a walo nga atleta ti manamnama a makisalip iti nasao a torneo no sadino dua kadagitoy ket manipud iti rehiyon Cordillera.
Daytoy ket pakairamanan ni Islay Erika Bomogao, ti gold medalist iti 2023 International Federation of Muaythai Associations Senior World Championships.
Sigun kenni Alumno, naipaayan dagitoy ti tallo nga aldaw nga ag-ensayo sadiay Thailand tapno adda a mas maadalda pay dagiti techniques dagiti ay-ayam.
Kalpasanna dayta, agsubli dagitoy iti pagilian para iti pinal a panag-ensayoda iti siudad ti Baguio sakbay nga agturongda sadiay Greece.
Impeksa met ni Alumno a panggep dagitoy nga inayon ti Muaythai iti Palarong Pambansa agsipud ta ado metten dagiti agbalbalin nga interesado iti daytoy.
Kabayatanna, pagsagsaganaan met laeng ti Muaythai-Philippine National Team ti manamnama a Thailand World Youth Championship inton Setyembre ti agdama a tawen ken ti Asian Indoor Martial Arts Game sadiay Thailand inton Nobyembre.//M
