Kinondenar ti Philippine Nurses Association idiay United Kingdom ti pannakairaman dagiti dua a Filipino nurse iti napamasak a gulo idiay Sunderland, England itay nabiit.
Maibasar iti report ti Mirror, paapan dagiti dua a pinoy nurse iti trabahoda idi naipit ti naglugananda a taxi iti mapaspasamak a gulo iti nasao a pagilian.
Binarbasak dagiti aggugulo a tattao ti taxi a nagluganan dagiti dua a pinoy nurse rason a nakarikna dagitoy iti nallabes a panagbuteng.
Kasaruno iti daytoy, impeksa ti Philippine Nurses Association idiay United Kingdom ti pannakipagmaymaysada tapno malabanan ti racism.
Binalakadan met ti Philippine Embassy idiay London dagiti Pilipino idiay United Kingdom nga agannad dagitoy gapu iti mapaspasamak a gulo ken krimen iti nagduduma a lugar idiay.
Kabayatanna, impasigurado met ni Secretary of State for Health and Social Care of the United Kingdom Wes Streeting a madusa dagiti karaman iti gulo a mangdangdangran kadagiti tattao.
“These people are there for our country when we need them. They look after us at our most vulnerable and bust a gut to keep us well. Their attackers bring shame on our nation and our flag. We will not tolerate NHS or social care staff being subjected to intimidation, harassment, or racist abuse,” kinuna ni streeting.
