Naituding nga agtinnulong ti Philippine Space Agency (PhilSA) ken Japan Aerospace Exploration Agency (JAXA) iti inisiatiba a makatulong kadagiti Pilipino gapu iti karit ti klima ken didigra, sigun kenni President Ferdinand “Bongbong” Marcos idi kalman.
Iti social media post ni President Marcos Jr., kinunana nga agtinnulong ti dua nga ahensia tapno ma-maximize ti space technology a mangipalubos a mapasayaat ken masalakniban ti biag dagiti Pilipino.
Kinunana a babaen kadagiti nasayaat a satellites, ad-adda a dagos a makita dagiti bagyo ken marespondean ti didigra, matulungan dagiti mannalon nga agplano a nasirib, ken pagtalinaeden a natalged dagiti komunidad.
Ni President Marcos Jr. ket nakisinnarak kadagiti JAXA executives kagiddan ti pannakitaripnongna idiay Osaka Japan idi Biernes, sigun iti Presidential Communications Office (PCO).
Ti JAXA ket maysa kadagiti partner ti Pilipinas iti space science, technology ken applications programs, babaen ti Department of Science and Technology (DOST).
