BAGUIO CITY – Nailista ti maysa nga insidente ti pick pocket a napasamak iti over pass ti central business district (CBD) ti siudad ti Baguio kalpasan ti Grand Street Dance Parade idi Pebrero bente kuatro, iti agdama a tawen.
Dagus met a narekober ti cellphone ken natiliw ti suspek babaen iti dagus a panagresponde dagiti kameng ti pulisya iti siudad.
Iti panakiuman ti Bombo Radyo kenni PCapt. Angeline Dongpaen, Information Officer ti Baguio City Police Office, mamati daytoy a dagiti dadduma a suspek ti pick pocket ditoy siudad ket dayo laeng.
Innayonna pay a manarimaan ti panangiberipekarda nu dagitoy ket tenants iti siudad.
Mainaig iti dayta, impeksa ni Dongpaen a naannayas ken natalna ti panakaisayangkat ti nasao a parada gapu iti panagtinnulong ti nagduduma a kameng dagiti pulisya.
Kabayatanna, awan met ti namonitor dagiti otoridad a nailet a gunay ti trapiko bayat ti parada ken awan ti nailista a traffic accident.//Bombo Marielle Apat
