Agtaltalinaed a maud-udi ti Pilipinas iti global standards iti Science ken Mathematics gapu iti ‘flat zero’ a grado ti Department of Education (DepEd) iti panaggatang ken panangiwaras iti Science ken Mathematics equipment packages kadagiti pagadalan.
Maibasar iti 2023 audit report ti Commission on Audit (COA), napaay ti DepEd a magun-od ti dagiti puntirya dagitoy partikular ti panagala kadagiti mannursuro, panangipatakder kadagiti classroom, panangiwaras ti learning tools ken equipment, panaggatang ti textbooks, panangipatungpal ti school-based feeding program iti uneg ti maysa a tawen iti sidong ti panangidaulo ni Vice President Sara Duterte.
Maibasar pay iti report ti COA maipapan iti DepEd Performance Indicator, 12,821 laeng a baro a classroom ti naipatakder manipud iti puntiya a 16,557 iti sidong ti Basic Education Facilities Fund (BEFF).
Manipud iti 8.9 million a puntirya a textbooks, instructional ken learning materials, 1.87 million laeng ti naimprenta ken naideliver kadagiti pagadalan.
Manipud iti 73,791 a puntirya a laptop para kadagiti mannursuro, smart TVs para kadagiti classroom, e-learning carts wenno ‘rolling libraries with laptops, 16,416 laeng ti nagatang ken naiwaras.
Iti met panagala wenno panaghire kadagiti mannursuro, 15,365 a posisyon ti kasapulan ngem 11,023 laeng ti naala.
Nupay umdas ti pundo para iti School-Based Feeding Program (SBFP), 5.33 million laeng nga estudyante ti nagnumar manipud iti puntirya a bilang a 6.94 million.
