Impasigurado ti Pilipinas iti China a saan a pangta ti kaadda ti United States intermediate-range missile system iti pagilian gapu ta naideploy daytoy kas paset ti joint military drills ti Estados Unidos ken Pilipinas.
Sigun kenni Department of Foreign Affairs Secretary Enrique Manalo, kinuwestionar ni Chinese Foreign Minister Wang Yi ti missile system kabayatan ti bilateral meeting a naipatungpal sadiay Laos.
Impeksa ni Wang a ti presenya ti missile ti Estados Unidos ket mabalin a destabilizing wenno mangkontrol ngem inyunay-unay ni Manalo a saan.
Immuna nga imbaga ni Wang idi napalabas a bulan a ti kinaadda ti missile system ti Estados Unidos ket posible a mangpataud iti regional tension.
Ti missile ket saan met a naar-aramat kabayatan ti drills ti dua a pagilian nupay kasta, kinuna ti Pilipinas a daytoy ket para iti panakaadal ti feasibility ti panakaitransport ti 40-ton a weapon system babaen ti tangatang.
Saan a mailibak a mapaspasamak ti security engagement iti nagbaetan ti Estados Unidos ken Pilipinas kas panagsagana iti makitkita a kinaagresibo ti China.
Inkari met ti Washington idi napalabas a bulan a mangipaay dagitoy iti $500 million nga usaren dagiti militar ken coast guard ti pagilian.
