Manamnama a maipatungpal ti “high level meeting” wenno panagtaripnong dagiti opisiales ti defense ken foreign affairs ti Pilipinas ken Japan idiay Metro Manila inton Hulio a otso iti agdama a tawen.
Daytoy ket tapno mapatibker ti napolitikaan ken militar a pannakipaset ti Japan iti tengnga ti kinaranggas nga ar-aramiden dagiti Chinese iti South China Sea.
Iti agdama, maipinpinal ti “defense agreement” wenno katulagan a maaw-awagan a Reciprocal Access Agreement wenno RAA a mangipalubos iti puersa ti Japanese a mangsanay kadagiti Pilipino ken posible a mapirmaan daytoy bayat ti naituding a panagtaripnong.
Ti panagtaripnong ket maawagan a “2+2 meeting,” nu sadinno makipagsinnarak ni Foreign Affairs Secretary Enrique Manalo ken Defense Secretary Gilbert Teodoro ken da Japan Foreign Minister Yoko Kamikawa ken Japan Minister of Defense Minoru Kigara para iti ministerial meeting.
Sigun iti Department of Foreign Affairs, ti uppat a nangngato nga opisial ket manamnama a mapagtalantanan ti pakaseknan iti “bilateral,” “defense,” ken seguridad a mangap-apektar iti rehion ken ti panagsinnukatda iti opinion iti pakaseknan ti regional ken interntaional.
Kabayatan ti panagbisita, maisayangkat ti agsina a bilateral meeting ti Secretary for Foreign Affairs ken Secretary of National Defense kadagiti katupagda nga opisial tapno pagsaritaanda dagiti lugar a pakaseknan ti tunggal maysa.
Maibilang a napateg ti panagtaripnong gaputa maangay daytoy iti panawen a palawaen ti China ti presensia ti militar iti South China Sea, a mangtignay iti pakaseknan manipud Japan, Estados Unidos, Australia, European Union, ken Canada gapu iti umad-adu nga agresibo ken naranggas nga aramidna kontra kadagiti babassit a claimants, kas iti Pilipinas.
