Pinasangbay ti Pilipinas dagiti suporta manipod kadagiti foreign ministers a maaw-awagan a Group of Seven (G7) kontra iti agresibo nga addang nga ipatpatungpal dagiti Chinese iti West Philippine Sea.
Iti maysa nga statement, pinagyamanan ti Department of Foreign Affairs ti “G7” para iti komitment dagitoy iti 1982 United Nations Convention on the Law of the Sea (UNCLOS) ken ti Arbitral Award ti 2016.
Sigun iti Department of Foreign Affairs, ti panagsuporta ket tapno isardengen ti China dagiti iligal nga aktibidad nga ipatpatungpapl dagitoy nangruna iti panagusarda ti coast guard ken maritime militia iti West Philippine Sea a mangituntunda ti napeggad a panagmaniobra.
Iti maysa met a waragawag maipapan iti karit ken panagkadwa ti sangalubungan, impeksa ti “G7” ti panagkontrada iti napeggad nga addang nga ipatpatungpal ti China iti West Philippine Sea ken impaganetgetda nga awan ti ligal a pagbasaran dagitoy tapno tagikuaen ti nasao a lugar.
Ti “G7” ket bukbuklen ti Canada, France, Germany, Italy, Japan, ti United Kingdom, ken ti Estados Unidos pakairamanan ti European Union.
Maipalagip nga idi tawen 2016, nakalanad iti international arbitration tribunal idiay Hague nga awan ti ligal a pagbasaran ti China a kukuada iti amin a paset ti South China Sea ngem inlaksid daytoy ti China.
