Inyuswat ti Department of Social Welfare and Development (DSWD) ken National Council on Disability Affairs (NCDA) ti pilot implementation ti unified identification (ID) system para kadagiti persons with disabilities (PWDs).
Nangrugi ti rollout sadiay San Miguel, Bulacan, ti umuna kadagiti 35 a pilot local government units (LGUs) a napili a mangipatungpal.
Nairanta daytoy a mangipaay ken mangseguro iti pannakaipaulog dagiti PWD ID.
Sigun kenni DSWD spokesperson Assistant Secretary Irene Dumlao, dagiti LGU babaen kadagiti Persons with Disability Affairs Offices ti mangasikaso iti aplikasion, verification, ken approval ti PWD ID cards.
Innayonna a ti National Council on Disability Affairs (NCDA) ti mangimaton iti centralized printing kadagiti physical ID.
Makikoordinar metlaeng ti nasao nga ahensia kadagiti participating LGUs tapno agaramidda iti schedule ti pilot roll kadagiti sumaganad a lawas.
Maipalagip a ti unified PWD ID ket addaan iti digital version a mabalin a maaramat babaen ti mobile app wenno web portal.
Mabalin metlaeng a mai-scan ti QR code daytoy para iti verification dagiti business establishments.
